1998-ci il təvəllüdlü Vidadi qeyri-rəsmi münasibətdə olduğu Nəzakətə bıçaqla xəsarət yetirib.
Demokrat.аz xəbər verir ki, hadisə ötən ilin sentyabrın 28-də baş verib.
Gədəbəy rayon sakini Vidadi həmin gün müvəqqəti yaşadığı evdə Nəzakətlə aralarında borc pul üstündə yaranan mübahisə zamanı yetkinlik yaşına çatmayan uşaqların gözü qarşısında qadına bıçaqla bir neçə zərbə vurub.
Hadisədən sonra Vidadi qaçaraq hadisə yerini tərk edib.
Onun barəsində Cinayət Məcəlləsinin 126.2.3 və 221.3-cü maddələri ilə ittiham irəli sürülüb.
Məhkəmədə ifadə verən təqsirləndirilən şəxs hadisənin ehtiyatsızlıqdan baş verdiyini iddia edib. O deyib ki, əsəbiləşdiyi üçün özünü itirib və Nəzakətə qəsdən zərər vurmaq niyyəti olmayıb.
Nəzakət isə ifadəsində bildirib ki, Vidadi ilə münasibətdə olub, lakin aralarındakı mübahisələr səbəbindən ondan uzaqlaşıb. O, hadisə günü Vidadinin ondan borc pul istədiyini, lakin pulu uşaqlar üçün saxlayaraq ona vermədiyini söyləyib.
Zərərçəkmiş qeyd edib ki, Vidadiyə ondan ayrılacağını, hər şeyin bitdiyini deyib: "Vidadi qapını içəridən bağlayaraq evdən bıçağı götürdü. Özünü öldürəcəyini dedi. Həmin vaxt uşaqlar evdə olub. O, əlindəki bıçaqla küçəyə çıxdı. Küçədə qonşular olub, onların arxasında gizləndim. Vidadiyə getməsini, yaxşı olmayacağını desəm də, qızımın canına and içərək mənə yaxınlaşdı. Heç nə etməyəcəyini desə də, yaxınlaşanda belindən bıçağı çıxartdığını gördüm. Həmin vaxt uşaqlar da yanımda olub. Vidadi bıçaqla sağ tərəfimdən mənə xəsarət yetirdi, sonra hadisə yerindən uzaqlaşdı".
Gəncə Ağır Cinayətlər Məhkəməsinin hökmü ilə Vidadi 7 il müddətinə azadlıqdan məhrum edilib və cəzasını ümumi rejimli müəssisədə çəkəcək.
Təqsirləndirilən şəxsin müdafiəçisi hökmdən apellyasiya şikayəti versə də, Gəncə Apellyasiya Məhkəməsi şikayəti təmin etməyib.
