Avqustun 4-də gənclər və idman naziri Fərid Qayıbov ay ərzində beynəlxalq yarışlarda yüksək nəticələr əldə etmiş idmançılarla görüş keçirib.
Gencexeber.az-ın məlumatına görə, tədbir Azərbaycan İdman Akademiyasında baş tutub. Görüşdə idmançıların məşqçiləri də iştirak ediblər. Nazir çıxış edərək, idmançılarımızın beynəlxalq arenada qazandıqları uğurları yüksək qiymətləndirib. O bildirib ki, təkcə iyul ayı ərzində Azərbaycanın Dövlət Himni 14 ölkədə səsləndirilib. Bu müddət ərzində təmsilçilərimiz ümumilikdə 55 qızıl, 42 gümüş və 66 bürünc medal qazanıblar.
Nazir Fərid Qayıbov bütün idmançıları və onların məşqçilərini təbrik edib, qarşıdakı yarışlarda daha böyük uğurlar arzulayıb. Görüş zamanı ay ərzində əldə olunan nailiyyətləri əks etdirən videoçarx nümayiş olunub.
Tədbirdə Gəncə şəhərini Azərbaycan Döyüş Federasiyaları Assosiasiyası (ADFA) Qərb Filialının Regional sədri, Əməkdar məşqçi, Fəxri Bədən Tərbiyəsi və İdman İşçisi İlqar Alıyev, Azərbaycan Uşu Federasiyasının qərb bölgəsi üzrə sədr müavini, Beynəlxalq dərəcəli hakim Fəxri Namazlı və uşu idmançısı Hümbət Mustafayev təmsil ediblər. H.Mustafayev 10–14 iyul tarixlərində Türkiyədə keçirilən uşu üzrə Balkan çempionatında birinci yeri tutaraq çempion olub.
Görüş çərçivəsində idmançılar və onların məşqçiləri qatıldıqları yarışlar və əldə etdikləri nəticələrlə bağlı çıxış ediblər. Uşu təmsilçiləri də söz alaraq uğurlarını tədbir iştirakçıları ilə bölüşüblər.
