Yaxın günlərdə Gəncəyə 23 ədəd “Isuzu Novociti” markalı aztutumlu yeni avtobusların gətiriləcəyi ilə bağlı iddialar səsləndirilib.
Gencexeber.az məlumat verir ki, sosial şəbəkələrdə yayılan məlumata görə, nəqliyyat vasitələri əvvəlcə Bakıda yerləşən “Isuzu” avtosalonuna çatdırılacaq, daha sonra isə Gəncəyə göndəriləcək.
Yeni avtobusların şəhərin 2 və 8 nömrəli marşrut xətlərində istifadəyə veriləcəyi iddia olunur.
Qeyd edək ki, “Isuzu Novociti” (digər adı “Novociti Life”) — 2018-ci ildən “Anadolu Isuzu” şirkəti tərəfindən istehsal olunan, aşağı sinifli, aztutumlu şəhər avtobusudur. 8 metr uzunluğunda olan bu model dizel yanacağı ilə çalışır, salonunda 16–17 oturacaq olmaqla ümumilikdə 60 sərnişin daşımaq imkanına malikdir.
Bu tip avtobusların bazar qiyməti təxminən 215 min manat təşkil edir.
