İsrailin Azərbaycandakı səfiri Corc Dik jurnalistlər üçün brifinq keçirib.
Trend.az xəbər verir ki, Corc Dik brifinq zamanı İkinci Qarabağ müharibəsi zamanı ermənilərin Gəncəni raketlərdən atəşə tutmasını xatırlayıb:
“Gəncəyə raketlər düşəndə mən ordaydım. 13 yaşında olan və yuxuda ikən həlak olmuş Artur Mayakov üçün axıdılan göz yaşlarını gördüm”.
O, həmçinin 7 oktyabrda İsraildə törədilən terror hücumlarından sonra göstərilən həmrəylik dalğasını da xatırladıb.
“7 oktyabrdan sonra gördüyümüz həmrəyliyi heç vaxt unutmayacağam. Azərbaycanlılar səfirliyimizin qarşısına gül və şamlar gətirirdilər”, – deyə o vurğulayıb.
İsrail və Azərbaycan xalqları arasında uzunmüddətli münasibətlərdən danışan diplomat bildirib ki, bu dostluğun kökləri əsrlər əvvələ gedib çıxır və rəsmi əlaqələrdən qat-qat dərin və əhatəlidir.
“Xalqlarımız arasında olan dostluq çox dərin və qədimdir. Bu dostluğun əsrlərlə yaşı var. Bu, Lev Landau, Azərbaycanın Milli Qəhrəmanı Albert Aqarunov, Birinci Qarabağ müharibəsində həlak olmuş Vahid Azizov və 7 oktyabrda İsrail kəndlərini müdafiə edərkən şəhid olan onun nəvəsi Lior Azizovun mirasıdır”, – deyə səfir əlavə edib.
