Bu gün həyatını gənc nəslin təlim-tərbiyəsinə həsr etmiş görkəmli müəllimə, ziyalı, pedaqoq və maarifçi Rahilə Novruzovanın doğum günüdür.
Gencexeber.az məlumat verir ki, Rahilə Yusuf qızı Novruzova 29 may 1954-cü ildə Gəncədə ziyalı ailəsində dünyaya göz açıb. Rahilə müəllimə 1977-ci ildə Gəncə Pedaqoji İnstitutunu bitirib və elə gənc yaşlarından müəllimlik fəaliyyətinə başlayıb. 1973-cü ildən etibarən Gəncə şəhər Kənd Təsərrüfatı Texnikumunda pedaqoji fəaliyyətlə məşğul olub. Daha sonra Gəncə Dövlət Universitetinin nəzdində fəaliyyət göstərən Regional Kollecdə uzun illər Azərbaycan dili və ədəbiyyat fənlərini tədris edib.
50 ilə yaxın müəllimlik fəaliyyəti dövründə yüzlərlə tələbə yetişdirən Rahilə Novruzova gənclərə yalnız bilik yox, həm də mənəvi dəyərlər aşılayıb. Hər bir şagirdinə ana nəvazişi ilə yanaşaraq, onların qayğı və problemlərinə dərindən bələd olub.
Bundan əlavə, o, 15 ildən artıq müddətdə "Hüquq və Səlahiyyət" qəzetinin baş redaktoru kimi də çalışıb. Əmək fəaliyyətinə görə “Əmək veteranı” adına layiq görülüb.
Həyatının son illərində ciddi sağlamlıq problemləri ilə üzləşən Rahilə müəllimə 5 ildən artıq müddətdə qaraciyər serozu xəstəliyindən əziyyət çəkib. Həkimlərin səyinə baxmayaraq, 2021-ci ilin iyulun 5-də Gəncədə vəfat edib.
Ruhu şad olsun!
