Gəncədə 175 900 kvadratmetr sahədə abadlıq və yenidənqurma işləri görülür.
Gencexeber.az-ın məlumatına görə, Gəncə şəhərinin Heydər Əliyev adına Mərkəzi Meydanında yenidənqurma və təmir-bərpa işləri davam edir. Bir neçə aydır davam edən layihə çərçivəsində meydanın tamet örtüyü tamamilə sökülüb, ərazidə yağış sularının axıdılması üçün yeni sistem quraşdırılıb. Hazırda isə sökülən tametlərin əvəzinə yeni örtük daşları döşənir. İşlər bütün meydan ərazisini əhatə edir.
Bununla yanaşı, Azərbaycan Respublikasının Prezidenti cənab İlham Əliyevin tapşırığına əsasən həyata keçirilən genişmiqyaslı abadlıq proqramı çərçivəsində bir sıra digər ərazilərdə də çalışmalar geniş vüsət alıb. Gəncə Şəhər İcra Hakimiyyətinin rəhbərliyi altında Heydər Əliyev adına Mərkəzi Meydan, “Gəncəçay” Park-Bulvar Kompleksi, Bayraq Meydanı, “Xan bağı”, Fikrət Əmirov adına park və Nizami Kinoteatrının qarşısında yerləşən istirahət parkı da əsaslı şəkildə yenidən qurulur. Sadalanan məkanlarda ümumilikdə 175 900 kvadratmetrlik sahədə abadlıq və yenidənqurma işlərinin həyata keçirilməsi nəzərdə tutulur.
Nizami Parkı kimi tanınan ərazidə isə demək olar ki, tamamilə yeni istirahət zonası salınır.
