Gəncəli güləşçi Nürəddin Novruzov Moskva şəhərində noyabrın 8-də keçiriləcək növbəti Peşəkar Güləş Liqası (PWL 10) turnirinə xüsusi dəvət alıb.
Gencexeber.az xəbər verir ki, Azərbaycanın gənc və iddialı idmançısı, dünya və Avropa çempionatlarının mükafatçısı Nürəddin Novruzov 61 kiloqram çəki dərəcəsində Olimpiya çempionu, üçqat dünya çempionu, Avropa çempionu, altıqat PWL qalibi Zaur Uquyevlə qarşılaşacaq.
Turnir Rusiya Federasiyasının paytaxtı Moskva şəhərində, "Dinamo Voleybol Arenası"nda baş tutacaq. Yarışın əsas hissəsi yalnız bir görüşdən ibarət olacaq və wrestlingtv.ru platformasında canlı yayımlanacaq.
Qeyd edək ki, Nürəddin Novruzov 2003-cü il noyabrın 18-də Gəncə şəhərində anadan olub. 2013-cü ildən güləşlə məşğuldur. Tanınmış məşqçi Adil İbrahimovun rəhbərliyi altında "Neftçi" İdman Klubunda çıxış edir. Gəncimiz Xorvatiyanın paytaxtı Zaqrebdə keçirilən dünya çempionatında bürünc medal qazanıb.
