Gəncə şəhərinin Cavad Rəfibəyli küçəsində yaşayan sakinlər aylardır yarımçıq qalan abadlıq işlərindən ciddi əziyyət çəkirlər.
Gencexeber.az-a daxil olan şikayətə əsasən, təxminən 8 ay öncə ərazidə yeni su və kanalizasiya xətti çəkilməsi məqsədi ilə qazıntı işləri aparılıb. Bu zaman küçənin əvvəlki asfalt örtüyü dağıdılıb, sakinlərə isə yolun tezliklə bərpa ediləcəyi və yenidən asfaltlanacağı vəd olunub.
Lakin buna baxmayaraq, işlər yarımçıq qalıb. Hazırda küçədə nə asfalt örtüyü var, nə də normal yol. Qazılmış sahələr daşlı-palçıqlı vəziyyətdə qalıb, bu isə həm piyadaların, həm də avtomobillərin hərəkətini çətinləşdirir.
Sakinlər bildirirlər ki, işləri aparan qurum izsiz-soraqsız aradan çıxıb. Onlar dəfələrlə aidiyyəti qurumlara müraciət etsələr də, nəticə ala bilməyiblər:
"Bizə dedilər ki, tezliklə yeni asfalt salınacaq. Amma aylarla səs çıxmadı, indi də yolumuz bataqlığa dönüb", – sakinlərdən biri qeyd edib.
Digərləri isə hesab edir ki, onları sadəcə aldadıblar və bu vəziyyət gündəlik həyatlarını ağırlaşdırır.
Məsələ ilə bağlı işlərin sifarişçisi olan Gəncə Şəhər İcra Hakimiyyəti mövqe bildirməkdən imtina edib. Bu isə sakinlərin narazılığını daha da artırıb. Onlar aylarla cavabsız qalan şikayətlərinə görə ümidlərini itirdiklərini deyirlər.
