Gəncədə qış mövsümü ərəfəsində qaz təzyiqinin zəifləməsi ilə bağlı narazılıqlar artıb.
Gencexeber.az-a daxil olan çoxsaylı şikayətlərdə bildirilir ki, şəhərin müxtəlif ərazilərində qaz təchizatı təkcə həftə ərzində bir neçə dəfə kəsilməklə kifayətlənmir, həm də gün ərzində təzyiq kəskin şəkildə aşağı düşür.
Ağa Mirzə Əhmədov küçəsində yaşayan sakin qeyd edir ki, vəziyyət hər gün təkrarlanır: "Günorta saatlarında, xüsusilə 18:00-a qədər qazın təzyiqi zəifləyir. Səhər saat 6-da işə hazırlaşanda qaz demək olar ki, yanmır. Yalnız axşam 6-dan sonra təzyiq artır. Bu hal nə vaxta qədər belə davam edəcək?"
Şikayətçilərin sözlərinə görə, dəfələrlə "Azəriqaz" İstehsalat Birliyinə müraciət edilməsinə baxmayaraq, problem köklü şəkildə həll olunmayıb. Qurum əməkdaşlarının əraziyə yönləndiriləcəyi bildirilib, lakin müəyyən müddət sonra qazın təzyiqi yenidən aşağı düşüb.
