Gəncə sakinləri 33 nömrəli avtobus marşrutunun uzun müddətdir fəaliyyət göstərməməsindən narazılıq edirlər.
Gencexeber.az-a müraciət edən vətəndaşların sözlərinə görə, həmin marşrut əvvəllər şəhər daxilində ən çox istifadə olunan xətlərdən biri olub. Onlar bildirirlər ki, bu avtobusla hər gün işə, uşaqlar isə məktəbə üz tuturdular. Lakin artıq bir müddətdir 33 nömrəli marşrut xətti fəaliyyətini dayandırıb və bu, gəncəlilər üçün ciddi çətinlik yaradır.
Sakinlər qeyd edirlər ki, məsələ ilə bağlı aidiyyəti qurumlara dəfələrlə müraciət ediblər, lakin problem həll olunmayıb. Onların fikrincə, marşrutun bərpası həm əhalinin rahatlığı, həm də şəhərdaxili nəqliyyatın yüklənməməsi baxımından vacibdir.
Redaksiyamız tərəfindən məsələ ilə bağlı Azərbaycan Yerüstü Nəqliyyat Agentliyinin (AYNA) Mətbuat Xidmətinə ünvanlanan sorğuya cavab olaraq bildirilib ki, Gəncə şəhəri üzrə marşrut xətlərində aparılan optimallaşdırma işlərindən əvvəl Gəncədə 33 nömrəli şəhərdaxili marşrut xətti fəaliyyət göstərib. Marşrut başlanğıc məntəqəsi İmamzadə türbəsi olmaqla Natəvan qəsəbəsini "Grand Bazar" və Gəncənin mərkəzi ilə əlaqələndirib. Təhlillər nəticəsində 33 nömrəli marşrut xəttinin qeyri-səmərəli olması müəyyən edilərək ləğv olunub, 4 nömrəli şəhərdaxili marşrut xətti isə yenidən təşkil edilib.
"Beləliklə, başlanğıc məntəqəsi İmamzadə türbəsi olan 4 nömrəli marşrut Natəvan qəsəbəsini Dəmiryol vağzalı, Gəncə şəhər mərkəzi və Gülüstan qəsəbəsi ilə ələqaləndirir. "Grand Bazar" və 1 nömrəli Şəhər Xəstəxanası istiqamətində səfər etmək istəyənlər isə "Sovxoz dairəsi" adlanan ərazidə yerdəyişmə edərək 10 nömrəli şəhərdaxili marşrut xəttindən istifadə edə bilərlər" – AYNA-dan bildirilib.
