Avqustun 31-də Gənclər və İdman Nazirliyi, Azərbaycan Üzgüçülük Federasiyası və Bakı Şəhər Halqası Əməliyyat Şirkətinin birgə təşkilatçılığı ilə "Kürü keçək?!" açıq suda üzmə yarışı keçirilib.
Gencexeber.az-ın məlumatına görə, 1991-ci il təvəllüdlü Gəncə sakini Gültəkin Kərimova 24–35 yaşlı qadın idmançılar arasında keçirilən yarışda 2-ci yerə layiq görülüb.
Üzgüçümüzə mükafatı gənclər və idman naziri Fərid Qayıbov, Azərbaycan Üzgüçülük Federasiyasının (ASF) prezidenti Zaur Əliyev, gənclər və idman nazirliyinin İdman şöbəsinin müdiri Elnur Məmmədov, ASF-nin vitse-prezidenti Xaliq İldırımzadə təqdim ediblər.
Qeyd edək ki, su idman növlərinin təbliği, daha geniş yayılması və inkişaf etdirilməsi məqsədilə keçirilən kütləvi yarış Mingəçevirdə, Kür sahilində baş tutub. Yarışda ölkəmizin müxtəlif rayon və şəhərlərindən ümumilikdə 288 nəfər üzüb, onlardan 273-ü finişə çatıb.
Bu, açıq suda sayca 5-ci yarışdır. İlk dəfə Bakıda "Xəzər dalğası" adı ilə 2022-ci ildə keçirilib. Yarış "Kürü keçək?!" adı ilə 4-cü dəfədir Mingəçevirdə, Kür sahilində təşkil edilir.
