Eskişehir Osmanqazi Universitetinin İqtisadi və İdarəetmə Fakültəsinin İqtisadiyyat ixtisasında təhsil alan gəncəli tələbə Amin Əliyev təhsil haqqını ödədiyi dövrdə internet üzərindən bir saytda dollar dəyişdirdiyi üçün həbs edilərək Antalyanın Döşəməaltı "L" Tipi həbsxanada saxlanılır.
Gencexeber.az-a Amin Əliyevin yaxınları tərəfindən verilən məlumata görə, gəncin heç bir cinayət niyyəti olmayıb. O, sadəcə dələduzların qurbanı olub. Bildirilib ki, Aminə valideynləri tərəfindən Azərbaycandan bank kartına manatla pul göndərilib. O da təhsil haqqını ödəmək üçün internet üzərindən pul dəyişdirib.
Əlavə edilib ki, Türkiyədə bu, leqaldır və xüsusi tətbiq üzərindən həyata keçirilir. Həmin tətbiqin sahibi Pakize Öz adlı xanımın 650 000 lirəsi (26 260 AZN) ələ keçirilib. Pakize xanım da polisə şikayət edib. Oktyabrın 10-u Amin da daxil olmaqla həmin tətbiq vasitəsilə pul dəyişdirən 8-9 nəfər saxlanılıb. Lakin atası Pakizə xanımı tapıb ona vəziyyəti başa saldıqdan sonra qadın şikayətini geri çəkib. Buna baxmayaraq Amin hələ də buraxılmayıb.
Sözügedən məsələ ilə bağlı Eskişehir Osmanqazi Universitetinin qarşısında gəncəli tələbəyə dəstək aksiyası keçirilib. Eskişehir Azərbaycanlılar Dərnəyi Gənclik Qolu başqanı Əlirza Əlirzayev çıxışında bildirib ki, azərbaycanlı tələbə Amin Əliyev təhsil haqqını ödədiyi zaman internet üzərindən bir saytda dollar dəyişdirdiyi üçün dələduz dəstənin qurduğu fırıldağın qurbanı olub. Onun sözlərinə görə, məhkəmə orqanlarının verdiyi səhv qərarlar ucbatından tələbənin təhsil hüququ pozulub.
Əlirza Əlirzayev Amin Əliyevə dəstək üçün Türkiyənin müvafiq qurumlarına müraciət də edib: "Bu ədalətsizliyin tez bir zamanda aradan qaldırılmasını və lazım gələrsə, Amin Əliyevin məhkəmə yekunlaşana qədər ölkədən çıxışına qadağa qoyulmasını tələb edirik. Unutmayaq ki, məhkəmə orqanları tərəfindən günahı sübuta yetirilənə qədər hər kəs günahsızdır. Biz tələbə olan Amin Əliyevə cinayətkar kimi yanaşılmasına və onun həbsinə etiraz edirik".
