Torpaqlarımızın azadlığı uğrunda canından keçən şəhidlərin xatirəsi xalqımızın qəlbində daim yaşayır. Onların hər biri igidliyin və qürurun rəmzidir. Kərim Məmmədov da bu müqəddəs amal uğrunda şəhidlik zirvəsinə ucalaraq adını qəhrəmanlar sırasına yazdırdı.
AZƏRTAC xəbər verir ki, Məmmədov Kərim Namil oğlu 1989-cu il aprelin 5-də Gəncə şəhərində anadan olub. 1995-2007-ci illərdə Gəncə şəhərində İ.Məmmədov adına liseydə təhsil alıb. 2007-2008-ci illərdə Azərbaycan Silahlı Qüvvələrində həqiqi hərbi xidmət keçib. 2012-ci ildən Daxili İşlər Nazirliyinin Daxili Qoşunlarında MAXE hərbi qulluqçu kimi xidmətə başlayan Kərim Məmmədov 2016-cı ilin Aprel döyüşlərində iştirak edib. Döyüşlərdən sonra Vətənə daha yaxın olmaq istəyi onu Azərbaycan Ordusuna gətirib. Gizir rütbəsi üzrə təhsil alaraq Müdafiə Nazirliyinin "N" saylı hərbi hissəsində xidmətini davam etdirib.
Kərim Məmmədov Murovdağ zirvəsinin və Kəlbəcər rayonunun azadlığı uğrunda gedən döyüşlərdə böyük şücaət göstərib. 2020-ci il oktyabrın 1-də Kəlbəcər istiqamətində aparılan əməliyyat zamanı şəhid olub. Qəhrəman gizir Gəncə şəhərinin Şəhidlər xiyabanında torpağa tapşırılıb. Ailəli idi, iki övladı yadigar qalıb.
Şəhidin həyat yoldaşı Əfsanə Məmmədovanın sözləri onun necə böyük Vətən sevgisinə sahib olduğunu bir daha göstərir: "O düşünürdü ki, Milli Orduda xidmət etsə, Vətən üçün daha yararlı olar. Müharibə başlamazdan əvvəl belindən əməliyyat olunmuşdu. Ona ikiaylıq məzuniyyət verilsə də, xidmətə qayıtdı. Müharibə başlayanda isə düşünmədən ön cəbhəyə yollandı. Ailə qurduğumuz gün, 2 oktyabrda şəhid oldu. Vətənini canından çox sevirdi".
Prezident İlham Əliyevin müvafiq sərəncamları ilə Kərim Məmmədov ölümündən sonra "Vətən uğrunda", "Kəlbəcərin azad olunmasına görə" və "Hərbi xidmətlərə görə" medalları ilə təltif edilib.
Kərim Məmmədovun igidliyi, Vətənə sevgisi və əbədi xatirəsi xalqımızın qəlbində daim yaşayacaq.
