Göygöldə Milli Yaylaq Festivalı çərçivəsində "Qəhrəman övladları" adlı yay düşərgəsi təşkil olunub.
Gencexeber.az-ın məlumatına görə, Gəncə Qarnizonu İdeoloji və Mədəniyyət Mərkəzi və “CZ Textile” şirkətinin birgə təşkilatçılığı ilə Vətən müharibəsi zamanı şəhidlik zirvəsinə ucalan Xüsusi Təyinatlı Qüvvələrin ailə üzvləri üçün tədbir keçirilib.
"Qəhrəman övladları" adlı yay düşərgəsi Göygöl rayonunun “Xan yurdu” etnoqəsəbəsində baş tutub. Yaylaq festivalı formatında keçirilən tədbirdə şəhid övladlarına müxtəlif hədiyyələr təqdim olunub. Ümumilikdə 60 nəfər şəhid ailəsi üzvü tədbirə qatılıb.
Hədiyyələrin təqdimatı gəncəli şəhid Fərid Şabanovun anası Qətibə Şabanova tərəfindən həyata keçirilib. Tədbir şəhid ailələrinin ehtiramla yad olunması və onların sosial-mənəvi dəstək alması baxımından mühüm əhəmiyyət daşıyıb.
