Gəncəli sərbəst güləşçi İtaliyanın Kaorle şəhərində keçirilən U-20 Avropa çempionatının finalına yüksəlib.
Bu barədə Gencexeber.az-a Azərbaycan Güləş Federasiyasından məlumat verilib.
Vasif Bağırov (57 kq) türkiyəli Nurettin Kapala (tuş) və macarıstanlı Karoli Barata (10:0) vaxtından əvvəl qalib gələrək yarımfinala yüksəlib. Vasif yarımfinalda moldovalı Yon Bulqaruya da heç bir şans tanımayıb – 8:1.
Ardıcıl 2-ci dəfə qitə birinciliyinin finalına vəsiqə qazanan Bağırov bu gün həlledici görüşdə gürcüstanlı Nika Zanqaladzeylə güləşəcək.
Qeyd edək ki, Gəncə şəhər 1 nömrəli Uşaq-Gənclər İdman-Şahmat Məktəbinin yetirməsi Vasif Bağırov sərbəst güləş üzrə Avropa (U-17) və dünya çempionudur.
