"Bakıdakı tıxac bu gün Gəncəyə qədər gedib çıxıb".
Gencexeber.az bildirir ki, bunu Milli Məclisin İnsan Hüquqları komitəsinin iclasında Gəncənin deputatı Naqif Həmzəyev deyib.
Deputat söyləyib ki, aidiyyəti qurumlar bir problemi həll edirlər, adamın ürəyi açılır, ancaq əlavə problem ortaya çıxır:
"İctimai nəqliyyat inkişaf etdirilir, avtobuslar alınır, avtobus zolağı çəkirlər, hər şey superdir. Ancaq digər tərəfdən şəxsi avtomobillə öz problemini həll etmək istəyən insanlara çətinlik yaranır. Eyni problemi bu gün Gəncədə də görə bilirik. Gəncədə yol problemi var idi, indi dövlətin dəstəyi ilə yollar bərpa olunur. Ancaq balaca yolda avtobus zolağı çəkiblər, orada onsuz da 2 avtomobil zülmlə keçir. Bakıdakı tıxac bu gün Gəncəyə gedib çıxıb. Aidiyyəti qurumlara səslənirəm: qaş düzəldən yerdə, vurub göz çıxartmayaq. Bakı və Gəncə bir ola bilməz. İnsanların, xüsusilə sərnişinlərin hüquqlarını pozmayaq, həll yolları axtaraq"
Onun sözlərinə görə, regionlarda məşğulluq, təhsil və infrastruktur sahələrində problemlər qalmaqda davam edir və bu məsələlərin həllində yalnız formal yanaşma ilə irəliləyiş əldə etmək mümkün deyil.
"Azərbaycan yalnız Bakıdan ibarət deyil. Kənd yerlərindəki həyat maraqlı və yaşamalı olmalıdır. Əgər bu məsələyə indi ciddi yanaşmasaq, qarşıdakı 10 ildə ağır nəticələrlə üzləşəcəyik. Məşğulluq məsələləri sadəcə yönləndirmə ilə həll olunmur. Yarmarkalar fərqli formatda təşkil olunmalıdır ki, vətəndaş həqiqətən iş tapa bilsin. İnsanlar regionda yaşayıb Bakıya gəlmək məcburiyyətində qalmasınlar", - millət vəkili bildirib.
