Gəncəli alim yeni institutun rəhbəri təyin olunub.
Gencexeber.az məlumat verir ki, Azərbaycan Respublikasının 2025–2028-ci illər üçün Süni İntellekt Strategiyasına uyğun olaraq, Mingəçevir Dövlət Universitetində elmi fəaliyyətin inkişafı istiqamətində mühüm addım atılıb. Universitetin nəzdində iki yeni elmi-tədqiqat qurumu – Süni İntellekt və Rəqəmsal Texnologiyalar İnstitutu ilə Tədqiqat və İnkişaf İnstitutu yaradılır.
Yeni təsis ediləcək Tədqiqat və İnkişaf İnstitutuna rəhbərlik isə Gəncənin istedadlı və perspektivli alimlərindən biri – Ramil Həsənova həvalə olunub.
Ramil İlham oğlu Həsənov 1989-cu ildə Gəncə şəhərində anadan olub və hazırda da bu şəhərdə yaşayır. Ali təhsilini Bakı Dövlət Universitetində bakalavr dərəcəsi üzrə başa vurub. Daha sonra isə magistr təhsilini əvvəlcə Azərbaycan Texnologiya Universitetində, ardınca isə İspaniyanın Haen Universitetində tamamlayıb. O, dünyanın nüfuzlu elmi bazalarından biri olan “Scopus”da 20-dən artıq elmi məqalənin müəllifidir.
Ramil Həsənov indiyədək Gəncə Alüminium Zavodunda müxtəlif vəzifələrdə çalışıb və bununla yanaşı Mingəçevir Dövlət Universitetində müəllim kimi pedaqoji fəaliyyət göstərib. Hazırda iqtisadiyyat üzrə fəlsəfə doktoru elmi dərəcəsi almaq üçün dissertasiya müdafiəsinin son mərhələsindədir.
