Gəncə Beynəlxalq Avtovağzalından Kəlbəcər və Ağdərə şəhərlərinə müntəzəm avtobus reyslərinin təşkili nəzərdə tutulur.
Bu barədə Gencexeber.az-a Azərbaycan Yerüstü Nəqliyyat Agentliyinin (AYNA) Gəncə Regional İdarəsindən məlumat verilib. Bildirilib ki, hazırda qeyd olunan istiqamətlər üzrə hazırlıq işləri aparılır.
“Sakinlərimizin sözügedən şəhərlərə köçməsindən sonra bu reyslər istifadəyə veriləcək. Avtobus marşrutlarının açılması üçün müvafiq müsabiqə elan olunacaq və qalib şirkət bu xətlərin daşımalarını həyata keçirəcək,” – İdarədən bildirilib.
Qeyd edək ki, layihənin əsas məqsədi işğaldan azad olunmuş ərazilərə təhlükəsiz və rahat ictimai nəqliyyat əlaqəsinin qurulmasıdır.
