Gəncə Şəhər İcra Hakimiyyəti yanında fəaliyyət göstərən “Yetkinlik yaşına çatmayanların işləri və hüquqlarının müdafiəsi üzrə komissiya” tərəfindən Əmək və Əhalinin Sosial Müdafiəsi Nazirliyinin tabeliyində olan 4 saylı Uşaq evi sosial xidmət müəssisəsində monitorinq həyata keçirilib.
Gencexeber.az bildirir ki, monitorinqin əsas məqsədi sosial xidmət müəssisəsində uşaqlar üçün təlim-tərbiyə prosesinin təşkili və bu sahədə mövcud vəziyyətin qiymətləndirilməsi olub.
Komissiya üzvləri monitorinq zamanı müəssisədə yaşayan yetkinlik yaşına çatmayan uşaqların hüquqlarının təmin olunması, onların yaşayış şəraiti, asudə vaxtlarının təşkili, tibbi və psixoloji xidmətlərin vəziyyəti ilə yaxından tanış olublar. Uşaqlarla fərdi söhbətlər aparılıb, gigiyena və qidalanma şəraiti, təhsilin keyfiyyəti, uşaqların psixoloji inkişafı və göstərilən dəstək xidmətləri müşahidə edilib.
Monitorinqin nəticəsi olaraq psixoloji xidmətlərin daha da gücləndirilməsi ilə bağlı tövsiyələr verilib. Eyni zamanda, aşkar olunan bir sıra çatışmazlıqlarla bağlı müvafiq qurumlara təqdim olunmaq üçün hesabat hazırlanıb.
Qeyd edək ki, monitorinq prosesi “Uşaq hüquqlarının müdafiəsi üzrə komissiyalar haqqında Əsasnamənin təsdiq edilməsi barədə” Azərbaycan Respublikasının Qanununa, həmçinin “Uşaq hüquqlarının həyata keçirilməsinin bütün sahələrdə təmin edilməsi vəziyyətinin monitorinqi üzrə meyarlar”ın təsdiq edilməsi haqqında Azərbaycan Respublikası Nazirlər Kabinetinin Qərarına uyğun olaraq aparılıb.
