Qəbul imtahanından keçən abituriyentlər qarşısında dayanan önəmli məsələlərdən biri də ixtisas seçimidir. Onlar əmək bazarına uyğun ixtisasa yiyələnməklə yanaşı, ödənişli əsaslarla təhsil alan zaman universitetlərin tələb etdiyi illik təhsil haqqına da fikir verməlidirlər. Hələlik universitetlərin plan yerləri və ixtisaslar üzrə tələb etdikləri illik ödənişin məbləği ilə bağlı konkret rəqəmlər məlum olmasa da, artıq bir sıra universitetlər ötənilki ilə müqayisədə bu il təhsil haqlarında müəyyən artımların olacağını qeyd ediblər.
Modern.аz I ixtisas qrupu üzrə ötən il üçün universitetlərin təhsil haqları ilə bağlı araşdırma edib.
Gəncədəki universitetlərdə I ixtisas qrupu üzrə ötən il üçün təhsil haqları:
Gəncə Dövlət Universitetində illik təhsil haqqı ən aşağı olan ixtisas maşın mühəndisliyidir, bu ixtisas üzrə təhsil alan tələbələr 1200 manat pul ödəyir. Riyaziyyat, həmçinin informatika müəllimliyi ixtisasları üzrə tələb olunan ödəniş isə 1800 manatdır. Bu, universitetdə tədris olunan ixtisaslar arasında tələb olunan ən yüksək təhsil haqqıdır.
Azərbaycan Dövlət Aqrar Universitetində isə əksər ixtisaslar yalnız dövlət sifarişi hesabına aparılır, lakin bu ali təhsil mərkəzlərində tədris olunan kompüter mühəndisliyi və informasiya texnologiyaları (hər ikisi əyani olmaqla) ixtisasında illik 1700 manat təhsil haqqı tələb olunur.
Gəncə şəhərində yerləşən Texnologiya Universitetində isə tələbələrdən tələb olunan illik ödəniş 1350-1550 manat arasında dəyişir.
