Gəncə şəhərinin 5-ci mikrorayon ərazisində, Üzeyir Hacıbəyli küçəsində (keçmiş Nazim Əliverdibeyov küçəsi) yerləşən yarımtikili zibilliyə çevrilib.
Gencexeber.az-a daxil olan çoxsaylı şikayətlərdə bildirilir ki, "Beta" şirkətinə məxsus binanın yaxınlığındakı bu ərazi uzun müddətdir baxımsız vəziyyətdədir və orada antisanitariya hökm sürür. Yarımtikilidə toplanan tullantılar həm piyada, həm də avtomobillərin istifadə etdiyi əsas yola dağılır, keçidi çətinləşdirir və üfunət yayır.
Sözügedən yer dəfələrlə təmizlənsə də, bir müddət sonra eyni hal yenidən müşahidə olunur. Şikayətçilərin sözlərinə görə, zibillik yığışdırılmadığı üçün bəzən ərazidən narazı olan şəxslər orada yığılan tullantıları yandırmağa cəhd edirlər. Bu isə yanğın təhlükəsi yaradır.
Həmçinin sakinlər iddia edir ki, həmin xarabalıq vəziyyətində olan yarımtikiliyə narkotik aludəçilərinin yığışdığını da müşahidə ediblər. Ərazidə yaşayan ailələr bu vəziyyətdən narahat olduqlarını ifadə ediblər.
Sakinlər aidiyyəti qurumlardan problemin qısa zamanda həll olunmasını, ərazidə təmizlik işlərinin aparılmasını və təhlükəsizlik tədbirlərinin gücləndirilməsini xahiş edirlər.
Qeyd edək ki, bu barədə daha öncə də tərəfimizdən məlumat dərc edilib. Lakin qeyd olunan hal dəyişməz olaraq qalır.
