Gəncə şəhərinin mərkəzi hissəsində, Heydər Əliyev prospektində yerləşən binaların sakinləri son günlər ciddi narahatlıq yaşayırlar.
Gencexeber.az-a şikayət ünvanlayan sakinlərin sözlərinə görə, binaların fasadında aparılan təmir işləri yarımçıq saxlanılıb və eyvanlar bərbad vəziyyətdədir.
Bildirilir ki, eyvanların təmizlənməməsi nəticəsində yığılan torpaq və tikinti məhsulları külək əsən kimi evlərin içinə dolur.
"Artıq neçə gündür bu vəziyyətdəyik. Eyvanlar torpaqla doludur. Hər küləkli gündə evdə toz fırtınası yaşanır. Körpəmiz var, nə qapı, nə də pəncərə aça bilirik", – deyə sakinlər qeyd ediblər.
Şikayətçilər əlavə edirlər ki, ərazidə uzun müddətdir heç bir iş görülmür, işçilər ortada yoxdur. Təmir işlərinin yarımçıq saxlanılması, eləcə də sahəyə nəzarətsizlik vəziyyəti daha da gərginləşdirib.
