Gəncədə 1 iyun – Uşaqların Beynəlxalq Müdafiəsi Günü münasibətilə xüsusi qayğıya ehtiyacı olan uşaqlar üçün bayram tədbiri təşkil edilib.
Gencexeber.az məlumat verir ki, tədbir Fərəh Sosial İctimai Birliyi və “Gəncə Qalası” ticarət mərkəzinin təşəbbüsü ilə baş tutub. Başlanğıcda layihənin rəhbəri Əzizə Quliyeva və Birliyin rəhbəri İlqar Hümbətov çıxış edərək tədbirin necə ərsəyə gəlməsini və uşaqlar üçün fikirlərini bölüşüblər.
Orada müxtəlif əyləncəli proqramlar, musiqi nömrələri və viktorina oyunlar təqdim edilib. Şəhid Yüksəl Əlizadə adına akustik musiqi və incəsənət mərkəzinin şagirdləri vətənpərvərlik ruhunda müxtəlif mahnılar ifa ediblər. Həmçinin uşaqlara “Gəncə Qalası” ticarət mərkəzi, “İsma toys” mağazası, eləcə də “Hicab” mağazası tərəfindən müxtəlif hədiyyələr paylanılıb.
Tədbirin əsas məqsədi cəmiyyətin ən həssas təbəqələrindən olan əlilliyi olan uşaqlara sevinc bəxş etmək, onların sosial inteqrasiyasına dəstək olmaq və uşaqlara qayğının vacibliyini bir daha vurğulamaq olub.
