Gəncənin Heydər Əliyev Meydanında WUF13 Festivalı təşkil olunub.
Gencexeber.az məlumat verir ki, tədbir çərçivəsində interaktiv fəaliyyətlər, maarifləndirici oyunlar, təqdimatlar və ictimai müzakirələr təşkil olunub. Tədbir zamanı dayanıqlı şəhər inkişafı, inklüziv şəhər mühiti, innovativ şəhər həlləri və gələcəyin şəhərləri kimi mövzular geniş auditoriyaya çatdırılıb.
Eyni zamanda, WUF13-ün əsas mövzusu və ideyaları barədə iştirakçılara ətraflı məlumat verilib. Festival proqramı çərçivəsində tanınmış müğənni Aslan Nuri və Xalq artisti Miri Yusifin ifasında səslənən musiqilər şəhər sakinləri tərəfindən böyük maraqla qarşılanıb.
Qeyd edək ki, Gəncə Şəhər İcra Hakimiyyətinin başçısı Niyazi Bayramovun, YAP Gəncə şəhər təşkilatının sədri Bayram Aslanovun, "WUF13 Azərbaycan" Əməliyyat Şirkətinin məzmun və media əlaqələri üzrə baş meneceri Eldar Rəsulovun, eləcə də şəhər sakinlərinin iştirak etdiyi tədbirin əsas məqsədi ölkə ictimaiyyətinin BMT-nin Ümumdünya Şəhərsalma Forumunun 13-cü Sessiyası barədə məlumatlandırılması olub.
Festivala mayın 13-də Bakı şəhərində, Dənizkənarı Bulvar ərazisində yerləşən Saat Qülləsi meydanında yekun vurulacaq.
