Xəbər verdiyimiz kimi, Gəncədə "BakuBus" MMC-yə məxsus 1 nömrəli müntəzəm marşrut xətti üzrə hərəkətdə olan avtobuslardan birində Heydər Əliyev prospektində sürücü ilə sərnişin arasında insident baş verib.
Gencexeber.az-a adıçəkilən sərnişindaşıma şirkətinin mətbuat xidmətindən verilən məlumata görə, hadisəyə sərnişinin sürücüdən avtobusu dayanacaqdan kənarda saxlamasını tələb etməsi səbəb olub. Sürücü bu tələbin marşrut hərəkəti qaydalarına zidd olduğunu izah edərək, sərnişinə bir neçə dəfə qaydalara uyğun şəkildə hərəkət etməli olduğunu bildirib. Lakin sərnişin sürücünün izahlarına məhəl qoymayaraq, təkrarən dayanma tələbini irəli sürüb və sürücünün ünvanına nalayiq ifadələr işlədib.
Baş verən gərginlik nəticəsində sürücü emosional vəziyyət səbəbindən avtobusu saxlayıb və idarəetməni müvəqqəti dayandırıb. Qısa fasilədən sonra sürücü sakitləşərək sükan arxasına keçib və avtobus hərəkətini davam etdirib.
Qeyd olunan hadisə ilə bağlı "BakuBus" MMC-nin aidiyyəti şöbəsi tərəfindən sürücü ilə profilaktik söhbət aparılıb, ona bu kimi hallarda daha təmkinli davranması barədə təlimat verilib.
"BakuBus" MMC sərnişinləri ictimai nəqliyyatdan istifadə qaydalarına əməl etməyə, eləcə də avtobusların yalnız müəyyən edilmiş dayanacaqlarda saxlanılmasını tələb etməyə çağırıb.
