Azərbaycan Texnologiya Universitetində (ATU) müasir əmək bazarının tələblərinə cavab verən, mühəndislik və iqtisadiyyat sahələrini əhatə edən geniş profilli kadr hazırlığı həyata keçirilir.
Gencexeber.az-a ali təhsil ocağından verilən məlumata görə, universitet tələbələrə bir sıra üstünlüklər təqdim edir. Yüksək akademik nəticə göstərən tələbələrə rektor təqaüdü verilir. Belə ki, semestri 1-ci yerdə bitirən tələbə 140 manat, 2-ci yerin sahibi 120 manat, 3-cü nəticə göstərən isə 100 manat təqaüd qazanır.
Bundan əlavə, sənaye müəssisələri tərəfindən ayrılan 100 AZN-lik xüsusi təqaüdlər və qəbul balı yüksək olan tələbələr üçün əlavə dəstək mexanizmləri mövcuddur. Qəbul zamanı 400-dən yuxarı bal toplayan abituriyentlər 100 manat, 500-dən yuxarı bal toplayanlar isə 200 manat məbləğində təqaüdlə təmin olunacaqlar.
Bildirilib ki, əsas üstünlüklərindən biri də sənayeyönümlü təhsil proqramları, yenilənmiş laboratoriyalar, ölkənin aparıcı zavod və fabriklərində istehsalat təcrübəsi, eləcə də mübadilə proqramları və startap dəstəyi ilə zəngin tədris mühitidir. Tələbələrin şəxsi inkişafına yönəlik özünüinkişaf klubları və müasir idman infrastrukturu da ATU-nun təqdim etdiyi imkanlar sırasındadır.
Qeyd edək ki, universitet “yaşıl kampus” konsepsiyası ilə ekoloji baxımdan da dayanıqlı təhsil mühiti formalaşdırır.
