Gəncənin mərkəzi küçələrində, xüsusilə Köhnə Yevlax avtovağzalının yaxınlığında illərdir davam edən qanunsuz taksi fəaliyyəti yenidən gündəmə gəlib.
Gencexeber.az xəbər verir ki, sənədsiz və qeydiyyatsız fəaliyyət göstərən bu nəqliyyat vasitələri sərnişin daşımaqla yanaşı, dayanacaqlarda sərbəst şəkildə müştəri götürürlər. Bu isə həm şəhər sakinlərinin, həm də rəsmi qaydada fəaliyyət göstərən sürücülərin narazılığına səbəb olur.
Qanuni fəaliyyət göstərən sürücülər bildirirlər ki, yeni qaydalara əsasən hər kəs eyni şərtlərə tabe olmalıdır. Onların sözlərinə görə, yüzlərlə sürücü heç bir icazə və şəhadətnamə olmadan taksi fəaliyyəti göstərir, bu da ədalətli rəqabəti pozur:
"Mən taksi fəaliyyəti ilə məşğul oluram və bütün sənədlərim qaydasındadır. Amma baxıram ki, çox adam qanunsuz işləyir. Əgər qanun qoyulubsa, hamıya eyni qaydada tətbiq olunmalıdır", – xüsusi hazırlıq keçmiş və şəhadətnamə alan sürücü bildirib.
Qeyd edək ki, Nazirlər Kabinetinin qərarına əsasən, 1 iyul 2024-cü ildən sonra taksi fəaliyyəti üçün yalnız istehsal tarixi 8 ildən az olan avtomobillərə icazə verilir. Həmçinin Dövlət İmtahan Mərkəzi tərəfindən sürücülərin xüsusi hazırlıq keçməsi və imtahandan uğurla keçərək şəhadətnamə alması tələb olunur.
