Gəncə şəhərində yerləşən M.A.Abbaszadə adına 20 nömrəli tam orta məktəbdə keçirilən “Son zəng” tədbiri zamanı xoşagəlməz hadisə baş verib.
Gencexeber.az məlumat verir ki, hadisə ilə bağlı sosial şəbəkələrdə yayılan görüntülərdə iddialar irəli sürülüb. İstifadəçilərin bildirdiyinə görə, məktəbin direktoru Mehriban Mahmudova tədbir zamanı çıxış edən 11a sinfinin şagirdlərini heç xoşlamadığını deyib. Bundan əlavə, həmin sinfin “Yaşa, Azərbaycan” mahnısı sədalarının müşayiəti ilə rəqs səhnəciyi tədbir vaxtı dayandırılıb.
İddialara görə, direktor sinif rəhbərinə səhnəciyi yarımçıq kəsməyi əmr edib. Səbəb isə tədbir öncəsi tüstü, fişəng, şar və gül istifadəsinin qadağan edilməsi olub.
Redaksiyamız məsələ ilə bağlı adıçəkilən məktəbin direktoru Mehriban Mahmudova ilə əlaqə saxlayıb. Direktor yayılan iddiaları təkzib edib və bildirilib ki, baş verən hadisələr şagirdlərin razılaşdırılmış ssenaridən kənar hərəkətləri nəticəsində yaşanıb: “Səsləndirilən iddialar həqiqəti əks etdirmir və tamamilə yalandır”.
M.Mahmudova yayılan videolardan birində “Bu sinfi heç xoşlamıram” ifadəsinə də münasibət bildirib: “Orada mənim də səsim düşüb, müəllimin də səsi düşüb. Qarışıqlıq olub. Heç özüm səsimi orada tanıya bilmirəm, hansı səs kimə aiddir. Bunlar hamısı boş iddialardır, uşaqların fantaziyasıdır”.
Direktor həmçinin videoların yayılmasında həmin sinfin bəzi şagirdlərinin əli olduğunu güman etdiyini, hətta onların bir qisminin bu səbəbdən polis qarşısında cavab verə biləcəyini istisna etməyib.
Qeyd edək ki, redaksiyamız tərəfindən məsələnin araşdırılması üçün Gəncə-Daşkəsən Regional Təhsil İdarəsinə sorğu ünvanlanıb.
