Gəncədə bəzi avtobus marşrutlarında sürücülərin sərnişinlərdən qanunsuz olaraq artırılmış gedişhaqqı tələb etməsi ilə bağlı redaksiyamıza çoxsaylı şikayətlər daxil olub.
Gencexeber.az məlumat verir ki, respublika ərazisində müasir tələblərə cavab verən və yalnız nağdsız ödəniş sistemi ilə fəaliyyət göstərən şəhərdaxili, qəsəbələrarası və şəhərətrafı avtobuslarda yeni tariflər təsdiqlənib. Qərara əsasən, məsafədən asılı olaraq dəyişən tariflərin aşağı həddi 60 qəpik olaraq müəyyənləşdirilib. Tariflər oktyabrın 1-dən qüvvəyə minib.
Lakin Sevinc qəsəbəsində fəaliyyət göstərən 20A marşrut xəttində istifadə olunan avtobuslarda nağdsız ödəniş sistemi tətbiq olunmur. Sərnişinlər yalnız nağd pul ödəməklə gediş edə bilirlər. Şikayətlərə görə, sürücülər sərnişinlərdən qanuni olaraq 50 qəpik müəyyən edilən haqq əvəzinə 60 qəpik tələb edirlər. Bu isə müvafiq qaydalara ziddir və süni qiymət artımı kimi qiymətləndirilir.
Qeyd edək ki, Gəncədə yalnız "BakuBus" MMC-yə məxsus avtobuslarda, həmçinin 2 və 8 nömrəli marşrut xətlərində nağdsız ödəniş sistemi tətbiq olunur. Yalnız bu marşrutlarda yeni tariflər qüvvəyə minib. Digər marşrut xətlərində əvvəlki tariflərin dəyişdirilməsi isə qanunsuzdur.
