Xəbər verdiyimiz kimi, "BakuBus"ın Gəncədə fəaliyyətə başlaması ilə əlaqədar olaraq, avtobuslarda gediş haqqını yalnız "CityCard" vasitəsilə deyil, həm də istənilən bank kartı ilə nağdsız şəkildə ödəmək mümkündür.
Lakin son günlər bu üsuldan istifadə edən sərnişinlərdən redaksiyamıza çoxsaylı şikayətlər daxil olub. Onların sözlərinə görə, müxtəlif bank kartları ilə ödəniş etdikdən sonra hesablarından iki, hətta üç dəfə eyni məbləğdə vəsait çıxılıb.
Gəncə sakini Gencexeber.az-a müraciətində bildirib ki, o, avtobuslarda ödəniş etmək üçün "LeoBank" kartından istifadə edir. İndiyədək heç bir problem yaşanmasa da, son günlərdə kartından gecə saatlarında avtobusdan istifadə etmədiyi halda əlavə ödəniş çıxılıb.
"Bu, dünən də baş verdi. Saat 18:22-də avtobusda 60 qəpik ödəniş etmişdim. Lakin gecə saat 03:56-da eyni məbləğ bir daha kartımdan tutuldu. Bu ilk belə hal deyil", – şikayətçi bildirib.
Onun sözlərinə görə, məsələ ilə bağlı əvvəlcə "LeoBank"a müraciət edib. Bank nümayəndələri isə ona ödənişləri internet üzərindən qəbul edən "PayRiff" şirkətinə müraciət etməyi tövsiyə ediblər. Lakin o, oradan da aydın cavab ala bilməyib:
"Onlar dedilər ki, ola bilər, pul avtobusda ödəmə zamanı çıxılmayıb, gecikmə ilə gecə saatlarında çıxılıb. Halbuki, mən eyni ödənişin iki dəfə tutulduğunu tarixçə ilə sübut etmişəm. Amma nə pul qaytarılıb, nə də məsələ həllini tapıb".
Qeyd edək ki, hazırda Gəncədə onlarla sərnişin eyni problemlə üzləşdiyini iddia edir. Onlar aidiyyəti qurumların məsələyə aydınlıq gətirməsini, artıq tutulan məbləğin geri qaytarılmasını və ödəniş resurslarının dəqiq işləməsi üçün tədbirlərin görülməsini tələb edirlər.
