Gəncədə uzun illərdir davam edən sənədsiz evlər problemi hələ də öz həllini tapmayıb. Xüsusilə şəhərin ətraf qəsəbələrində vəziyyət getdikcə çətinləşir.
Gencexeber.az məlumat verir ki, 1980-ci illərin sonu və 1990-cı illərin əvvəllərində tikilən evlərin əksəriyyəti rəsmi sənədsizdir. Rəsmi statistikaya görə yalnız Məhsəti (Sevinc) qəsəbəsində təxminən 6 min, qeyri-rəsmi məlumatlara görə isə 10 minə yaxın sakin sənədsiz evlərdə yaşayır. Həmin ərazilərdə müəyyən infrastruktur yaradılsa da, evlərin çoxunun hüquqi sənədi mövcud deyil.
Bu evlərin hansı əsasla tikildiyi və torpaq sahələrinin hansı yollarla ayrıldığı ayrıca müzakirə mövzusudur. Lakin hazırkı vəziyyət ondan ibarətdir ki, minlərlə sakin nə rəsmi qeydiyyata düşə bilir, nə də mülkiyyətini təsdiq edən sənədə sahibdir.
Məlumata görə, Gəncədə sənədsiz evlərin böyük qismi vaxtilə bələdiyyə mülkiyyətində olan boş torpaqlarda inşa edilib.
Sakinlər ümid edirlər ki, məsələ ilə bağlı yerli İcra Hakimiyyəti dəstək göstərəcək və problemin köklü həlli istiqamətində addımlar atılacaq.
