Gəncənin Zülfü Hacıyev küçəsində yerləşən “SemSan” zavodunun havaya buraxdığı zəhərli tüstüdən ətraf küçələrdə yaşayan sakinlər əziyyət çəkdiklərini bildirirlər.
Gencexeber.az-a daxil olan iddialara əsasən, sakinlər bir neçə il əvvəl Ekologiya və Təbii Sərvətlər Nazirliyinə etdikləri müraciətlərdən sonra zərərli tullantıların həcmi azalmışdı. Lakin qısa müddət sonra problem yenidən ortaya çıxıb.
“Əvvəllər də tüstü çox olurdu, amma zavod nəqliyyat vasitələrinin utilizasiyası fəaliyyətinə başladıqdan sonra havadakı çirklənmə daha da artdı. İndi isə pəncərələri açmaq belə mümkün deyil” – ərazidə yaşayan sakinlər iddia ediblər.
Məlumata görə, “SemSan” şirkəti bu sahədə operator olan “Təmiz Şəhər” ASC tərəfindən utilizator kimi rəsmi reyestrə daxil edilib. Zavod alüminium külçələr, latun çubuqlar, qurğuşun külçələr, sink konsentratı, santexnika məmulatları, paslanmaz polad külçələr, alüminium şinlər, dəmir və çuqun tökmələr, eləcə də müxtəlif latun profillərin istehsalı üzrə ixtisaslaşıb.
Sakinlər aidiyyəti dövlət qurumlarından problemin aradan qaldırılması üçün tədbirlər görülməsini tələb edirlər.
Qeyd edək ki, redaksiyamızın zavod rəhbərliyi ilə əlaqə saxlamaq cəhdləri nəticəsiz qalıb. Buna səbəb müəssisənin rəsmi saytında göstərilən telefon nömrələrinin bir rəqəminin əskik olması yaxud təyin edilməməsi olub.
