Gəncə daxil Azərbaycanın bir çox yerlərində maraqlı, eyni zamanda, narahatedici bir meyil yayılıb.
Lent.az-ın məlumatına görə, bəzi gənclər arasında “idmançı görünüşü” əldə etmək üçün qulaqlarını bilərəkdən zədələtmək dəbə çevrilib. Hətta sosial şəbəkələrdə bu məqsədlə xüsusi səhifələr yaradılıb və “qulaqqırma xidməti” təklif olunur.
Xidmət göstərən şəxslər çəkdikləri videoları paylaşaraq həm “nəticəni nümayiş etdirir”, həm də yeni müştərilər toplamağa çalışırlar. Qiymətlər isə gənclər üçün əlçatan hesab edilir: bir qulağın qırılması 70 manata başa gəlir.
Məsələ ilə bağlı açıqlama verən tibb üzrə elmlər doktoru Adil Qeybulla bildirib ki, insanın taleyi, səhhəti ilə bağlı məsələlər onun öz qərarına bağlıdır:
“Lakin bir şeyi nəzərə almaq lazımdır ki, əgər bunlar ictimai təhlükə yaradırsa, buna dövlət də müdaxilə etməlidir. Bu işi görən adamların lisenziyası varmı? Onlar ciddi şəkildə araşdırılmalıdır”.
Psixoloq Elnur Rüstəmov bildirib ki, “idmançı görünüşü” üçün qulaqsındırma tendensiyası, əslində, narahatedici sosial-psixoloji problemdir:
“Gənclər arasında bu cür davranış, əslində, bir çox səbəblərdən qaynaqlanır. Səbəblərdən biri kimlik axtarışıdır. Xüsusən, gənclik dövründə insanlar “mən kiməm?” sualına cavab axtarırlar. İdmançıya bənzəmək, “qorxmaz və güclü” obrazı yaratmaq bir çox gəncin həm yaşıdları, həm də sosial mühit qarşısında qəbul olunmaq üçün seçdiyi yoldur. Belə ki, qulağın sındırılması xarici görünüşdə sərtlik və “döyüşçü” imici yaradır. Bu isə onlarda bir növ kimlik təsdiqi rolunu oynayır.
Başqa bir səbəb kimi sosial şəbəkələri qeyd edə bilərik. Çünki sosial media müasir gənclərin davranışlarında çox böyük rol oynayır. Bu gün artıq müəyyən davranış və ya görüntü sosial şəbəkədə trend olur və gənclər arasında sürətlə yayılır. Qulaq sındırmaq da bir növ “status simvolu” kimi təqdim olunduqda insanlar onu izləyir və təqlid edirlər. Nəzərə alsaq ki, ödənişli xidmətlərin yaranması bu prosesi kommersiyalaşdıraraq daha geniş yayılmasına səbəb olur”.
