Gəncədə gənclər və yeniyetmələrdən ibarət regionun kikboksinq yığmasının toplanışı keçirilib.
Gencexeber.az-ın məlumatına əsasən, Gəncədə yerləşən “Sensey” idman klubunun bazasında baş tutan toplanış Azərbaycan Kikboksinq Federasiyasının (AKF) rəhbərliyinin göstərişi və nəzarəti altında təşkil olunub. Tədbirə əməkdar məşqçi, beynəlxalq dərəcəli hakim, AKF-nın Qərb regionunun sədri Anar Məmmədov, AKF-nin Gəncə üzrə baş məşqçisi, əməkdar məşqçi Elnur Salamov, böyük məşqçi Maqsud Allahverdiyev, yeniyetmələrin baş məşqçisi Pərviz Əliyev və böyük məşqçi Ayxan Bayramov rəhbərlik ediblər.
Məşqlərdə 60-a yaxın kikboksçu iştirak edib.
Federasiyanın bu təşəbbüsünün əsas məqsədi klublar arasında həmrəylik və birliyi qoruyub saxlamaq, idmançılar arasında vətənpərvərlik ruhunu və dostluq münasibətlərini gücləndirmək, eləcə də texniki-taktiki və fiziki göstəriciləri artırmaqdır.
Bundan başqa, belə toplantılar kikboksinq idman növünün kütləviləşdirilməsinə xidmət edir.
