Gəncə şəhərində əsən güclü külək nəticəsində dam örtükləri zərər çəkmiş çoxmənzilli binalarda Gəncə Şəhər İcra Hakimiyyətinin sifarişi ilə podratçı şirkət tərəfindən və Mənzil Kommunal Təsərrüfatı İstehsalat Birliyinin dəstəyi ilə təmir-bərpa işləri davam etdirilir.
Gencexeber.az bildirir ki, əsaslı təmir Nizami Gəncəvi prospektində yerləşən 10 saylı yaşayış binasında aparılır. Belə ki, sözügedən ünvanda yerləşən yaşayış binasının yararsız hala düşən dam örtüyü tam şəkildə sökülərək, yenidən qurulur.
Təmir-bərpa işlərinə aprel ayının 14-dən başlanılıb və təxminən 2 həftəyə yekunlaşacağı nəzərdə tutulub. Bu müddət ərzində dam örtüyünün 1354 kv.metri tam şəkildə yenilənəcək.
Qeyd edək ki, fevral ayının 27-də Gəncə şəhər ərazisində əsən güclü külək nəticəsində bir neçə çoxmənzilli yaşayış binasının dam örtüyünə tam və ya qismən şəkildə ziyan dəyib.
