Xəbər verdiyimiz kimi, Gəncədə 1996-cı il təvəllüdlü Elmir Əmirov bıçaqlanıb. Xəsarət yetirməkdə şübhəli bilinən Sərxan Qəhrəmanov və Ruslan Abbasov saxlanılaraq istintaqa təhvil verilib.
Gununsesi.info saytında dərc edilən məlumatda iddia edilib ki, hadisəyə səbəb Elmir Əmirovun sevgilisi ilə küçədə əl-ələ tutaraq öpüşməsi olub. Bildirilib ki, bu hal şübhəlilərdə qəzəb yaradıb.
Lakin Gencexeber.az-ın qeyri-rəsmi mənbələrdən əldə etdiyi məlumata görə, insident avqustun 25-də Gəncə yaşayış kompleksinin (MİDA) həyətində baş verib. Elmir Əmirov həmin gün rəfiqəsini evinə ötürmək üçün əraziyə gəlib və onlar binanın həyətində yerləşən söhbətgahda əyləşərək söhbət ediblər. Qısa müddət sonra isə onlara 5-dən çox şəxs yaxınlaşaraq “bizim məhəlləyə niyə gəlmisən?” sualı ilə müraciət edib. Elmir xanımı evinə ötürdüyünü bildirsə də, qəflətən ona kütləvi hücum olunub.
Mənbələrin iddiasına görə, hücum edən şəxslər psixotrop vasitələrdən istifadə ediblər və psixoloji vəziyyətləri normal olmayıb. İddia edilib ki, bu, onların ilk belə əməli deyil — həmin şəxslər daha əvvəl də oxşar hərəkətlərə yol veriblər.
Qeyd edilib ki, hadisəni törədənlər əməllərini ört-basdır etmək üçün ilkin versiya kimi guya Elmir Əmirovun xanımla öpüşdüyünü iddia etsələr də, daha sonra bu iddianı təkzib ediblər. Üstəlik, ərazidəki müşahidə kameralarının görüntülərində səsləndirilən versiyanın tamamilə əsassız olduğu açıq şəkildə əks edilib.
Mənbələr əlavə edib ki, uşaqların, qadınların və yaşlı vətəndaşların olduğu bir yerdə öpüşmə iddiası absurddur və yalnız uydurma xarakter daşıyır.
Faktla bağlı istintaq davam etdirilir.
