Gəncədə “Böyük Qayıdış” proqramı çərçivəsində peşə təlimlərini başa vuran məcburi köçkünlərlə görüş təşkil olunub.
Gencexeber.az-ın məlumatına görə, Gəncədə “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində Ticarət və Xidmət üzrə Gəncə Dövlət Peşə Təhsil Mərkəzində və Sənaye və Texnologiyalar üzrə Gəncə Dövlət Peşə Təhsil Mərkəzində qısamüddətli təlimləri uğurla başa vuran müdavimlərə görüş keçirilib. Tədbirdə deputat Müşfiq Cəfərov, Təhsildə Keyfiyyətin Təminatı Agentliyinin təlim və metodologiya şöbəsinin müdiri Simnar Məmmədov, Azərbaycan Qaçqınların və Məcburi Köçkünlərin İşləri üzrə Dövlət Komitəsinin Gəncə üzrə nümayəndələri və s. şəxslər iştirak ediblər.
Tədbirdə bildirilib ki, cari ildə Gəncə şəhərində məskunlaşan 182 nəfər məcburi köçkün qısamüddətli təlimlərə cəlb edilib. Ticarət və Xidmət üzrə Gəncə Dövlət Peşə Təhsil Mərkəzində qənnadçı-şirniyyatçı, satış təmsilçisi, mehmanxana qeydiyyatçısı, ofisiant, barmen və mühasib ixtisasları üzrə 120, Sənaye və Texnologiyalar üzrə Gəncə Dövlət Peşə Təhsil Mərkəzində isə elektrik avadanlıqlarına xidmət və təmir üzrə elektrik montyoru, isitmə-soyutma, havalandırma sistemləri və avadanlıqları üzrə montajçı, təmirçi-çilingər və mühasib ixtisasları üzrə təlimləri isə 62 nəfər uğurla başa vurub.
Təlim proqramları 1 aydan 3 ayadək müddətinə nəzəri biliklərin və praktik bacarıqların inteqrasiyası əsasında hazırlanıb. Əsas məqsəd Böyük Qayıdışa dair I Dövlət Proqramı çərçivəsində işğaldan azad edilmiş ərazilərə qayıdan əhalinin kvalifikasiyalarının artırılması yolu ilə davamlı məşğulluğunun təmin edilməsidir.
