Gəncədə ötən il partlayan binanın sakinləri onlara ödənilən kirayə pularının kəsildiyini iddia edirlər.
Gencexeber.az məlumat verir ki, oktyabrın 18-də Gəncə şəhəri İsaq Cəfərov küçəsində baş verən partlayış nəticəsində dağılmış beşmərtəbəli yaşayış binasının sakinləri yerli hakimiyyət orqanlarından təxminən 2 aya yaxın müddət ərzində ala biliblər. Zərərçəkənlər ilk ödənişləri yalnız noyabrın 27-də - faciədən 41 gün sonra alıblar.
Sakinlərin bir qismi iddia edir ki, 10 ay keçməsinə baxmayaraq onların həyat şəraitinin yaxşılaşdırılması istiqamətində zəruri addımlar atılmayıb. Bundan başqa avqust ayı üzrə kirayə pulları ödənilməyib. Bu səbəbdən onlar ciddi maliyə problemi ilə üzləşdiklərini söyləyiblər.
Əlavə olunub ki, Gəncə Şəhər İcra Hakimiyyətinə müraciət etdikdən sonra onlara vəsaitlərin köçürüləcəyinə dair vədlər verilsə də, ödəniş hələ də həyata keçirilməyib.
Sakinlərin sözlərinə görə, hazırda yalnız bir neçə nəfərin – üçüncü mərtəbədən yuxarıda yerləşən mənzilləri təmir edilir. Birinci və ikinci mərtəbədəki mənzillərdə isə hələ də çatlar qalmaqdadır. Hətta digər girişdə yerləşən bəzi mənzillər indiyədək qəzalı vəziyyətdədir.
Qeyd edək ki, Fövqəladə Hallar Nazirliyinin mütəxəssisləri facidən bir müddət sonra evin iki blokunu yaşayış üçün yararsız elan edib. Evsiz qalan insanlar isə şəxsi mənzillərində yaşamaq imkanından mərhum olublar.
Məsələ ilə bağlı redaksiyamız tərəfindən Gəncə Şəhər İcra Hakimiyyətinə sorğu ünvanlanıb.
