Gəncə şəhərində son günlər əsən güclü külək nəticəsində Dəmiryolçular parkında bir ağac aşıb.
Gencexeber.az-ın məlumatına əsasən, hadisə zamanı xəsarət alan olmasa da, ərazidə tez-tez uşaqların oynadığı nəzərə alınarsa, bu hal ciddi təhlükə mənbəyinə çevrilib. Çünki ağac əyilmiş vəziyyətdə parkda qalmaqdadır.
Sakinlərin sözlərinə görə, park uzun müddətdir ki, baxımsız vəziyyətdədir, təmir işləri aparılmır.
Yaşıllıqlara lazımi qulluq göstərilmir, qurumuş və zəifləmiş ağacların vaxtında budanması və ya yenilənməsi təmin olunmur.
Sakinlər aidiyyəti qurumlardan ərazidə təmizlik və abadlıq işlərinin aparılmasını, xüsusilə uşaqların istirahət etdiyi bu parkın daha ciddi nəzarətə götürülməsini tələb edirlər.
