Gəncədə yerləşən “Semsan” şirkəti nəqliyyat vasitələrinin utilizasiyası fəaliyyətinə başlayıb. Şirkət, bu sahədə operator olan “Təmiz Şəhər” Açıq Səhmdar Cəmiyyəti tərəfindən utilizator kimi reyestrə daxil edilib.
Gencexeber.az bildirir ki, bununla əlaqədar olaraq, Gəncə Şəhər İcra Hakimiyyəti başçısının müavini Adil Tağıyev sözügedən müəssisədə olub, burada görülən işlərlə yerində tanış olub.
Bildirilib ki, sözügedən müəssisədə bu günə qədər 200-dək nəqliyyat vasitəsinin utilizasiyası həyata keçirilib.
“Tullantılar haqqında” Azərbaycan Respublikasının Qanununun müddəalarına uyğun şəkildə həyata keçirilən proses çərçivəsində, ötən ilin oktyabr ayından bu günədək 4600-ə yaxın nəqliyyat vasitəsi utilizasiyaya verilib. Eyni zamanda, proqram çərçivəsində indiyə qədər 227 ədəd yerli istehsal olan yeni nəqliyyat vasitəsinin güzəştlə satışı həyata keçirilib.
Nəqliyyat vasitələrinin utilizasiyası könüllülük prinsipi əsasında aparılır və məcburi xarakter daşımır.
