Gəncə şəhər Mənzil Kommunal Təsərrüfatı İstehsalat Birliyi (MKTİB) tərəfindən şəhərin müxtəlif ərazilərində istismar müddətini başa vuran və vətəndaşlar tərəfindən yandırılaraq yararsız hala salınan zibil konteynerləri yeniləri ilə əvəzlənib.
Gencexeber.az bildirir ki, qurumun xüsusi texnikaları vasitəsilə yeni konteynerlər Heydər Əliyev, Atatürk, Şah İsmayıl Xətai və Nəriman Nərimanov prospektlərində və bir neçə küçədə təyin olunan ərazilərə yerləşdirilib.
MKTİB tərəfindən son yenilənən konteynerlərin sayı 200 ədədə çatdırılıb.
Gəncə şəhər Mənzil Kommunal Təsərrüfatı İstehsalat Birliyi əhali və qeyri-əhali qrupuna müraciət edərək bildirib ki, yeni və mövcud konteynerlərin daxilində, həmçinin ətrafında zibil yandırmasınlar: "Bu kimi neqativ hallar ətraf ərazinin tüstü ilə çirkləndirilərək vətəndaşların haqlı narazılığına səbəb olmaqla yanaşı, həmçinin konteynerlərin zədələnərək vaxtından əvvəl sıradan çıxmasına gətirib çıxarır. Bu kimi hallara yol verənlər aşkar olunduqca onlar barəsinə qanunvericiliyin tələblərinə uyğun olaraq inzibati tədbirlər görüləcək".
