Gəncə şəhərində yağışlardan sonra əsas prospektlərdən birinin vəziyyəti sakinlərin narazılığına səbəb olub.
Gencexeber.az xəbər verir ki, söhbət Nizami prospekti 8-ci dalandan gedir. Həmin dalan Gəncə şəhər Fikrət Əmirov adına 1 nömrəli Uşaq Musiqi Məktəbinin arxasında yerləşir. Yaxınlığında həmçinin Butulkalı ev kimi turizm baxımından əhəmiyyətli məkan mövcuddur.
Sakinlərin sözlərinə görə, uzun illərdir asfaltlanmayan dalan hər yağışdan sonra palçığa qərq olur. Kanalizasiya sisteminin olmaması səbəbindən sular orada yığılır, rütubət nəticəsində evlərin bünövrəsi zədələnib. İşıqlandırma sisteminin olmaması isə vəziyyəti daha da ağırlaşdırır.
"Bu ərazidə ən pis vəziyyətdə olan buradır. Şəhərdə abadlıq işləri aparılarkən bu tarixi yerə də diqqət ayrılsın. Asfalt, kanalizasiya, işıqlandırma – nə mümkündürsə edilsin", – sakin bildirib.
Qeyd edək ki, hazırda Gəncədə bir çox ərazilərdə abadlaşdırma və infrastruktur işləri həyata keçirilir. Sakinlər ümid edirlər ki, Nizami prospektinin 8-ci dalanı da yaxın zamanda təmir ediləcək.
