Gəncədə işıqforlarla bağlı təhlükəli vəziyyət yaranıb.
Gencexeber.az-ın məlumatına görə, Gəncə şəhərinin Cəfər Cabbarlı küçəsində, M.Füzuli adına 22 nömrəli tam orta məktəbin qarşısında yol hərəkəti iştirakçıları üçün təhlükə mövcuddur.
Sözügedən ərazidə quraşdırılmış işıqforlar hazırda ağacların sıx budaqları arasında qaldığından, sürücülər və piyadalar tərəfindən demək olar ki, görünmür. Bu isə həm məktəbin qarşısında hərəkət edən şagirdlər, həm də ümumilikdə yol hərəkəti iştirakçıları üçün ciddi risk yaradır.
Şəhər sakinləri məsələ ilə bağlı aidiyyəti qurumların tədbir görməsini, işıqforların görünməsini təmin etmək üçün ağacların budanmasını tələb edirlər.
