Gəncə sakinləri yaşadıqları küçədə aparılan asfaltlama işlərindən razı qalmayıblar.
Gencexeber.az-a daxil olan şikayətə görə, Gəncə şəhərinin Aida İmaquliyeva küçəsində (keçmiş Muxtar Hacıyev küçəsi) bir müddət əvvəl aparılan genişmiqyaslı asfaltlama işləri tam başa çatdırılmayıb. 13a nömrəli binanın qarşısında yerləşən kiçik guşə asfaltlanmayaraq, daşlı-qumlu vəziyyətdə saxlanılıb.
Sakinlər bildirirlər ki, ərazinin bu şəkildə qalması həm uşaqlar, həm də yaşlı insanlar üçün narahatlıq yaradır. Onlar ya həmin hissənin asfaltlanmasını, ya da uşaqların asudə vaxtlarını səmərəli keçirmələri üçün abadlaşdırılaraq oyun və istirahət zonasına çevrilməsini istəyirlər.
Qeyd edək ki, həmin guşəyə yaxın olan və onillər əvvəl inşa edilmiş futbol meydançası da istifadəyə yararsız vəziyyətdədir. Meydançanın örtüyü və dəmir çəpəri yoxdur.
Sakinlər aidiyyəti qurumları məsələ ilə bağlı tədbir görməyə çağırırlar.
