Gəncədə geniş vüsət alan qanunsuz küçə ticarəti şəhər sakinləri arasında müxtəlif reaksiyalara səbəb olur.
Gencexeber.az-ın məlumatına görə, qanunsuz küçə ticarəti Gəncə şəhərinin mərkəzi də daxil olmaqla bir sıra ərazilərdə yayılmaqda davam edir. Təqdim etdiyimiz görüntülər Gəncə Birləşmiş Xəstəxanasının qarşısında, Məmməd Xələfov küçəsində çəkilib. Piyada səkinin əksər hissəsi pərakəndə ticarət obyektləri ilə zəbt olunub, bəzi yerlərdə isə mağaza və köşklərin qarşısına qoyulan soyuducular piyadaların hərəkətinə maneə yaradır.
Buna baxmayaraq, Gəncə Şəhər İcra Hakimiyyətinin başçısı Niyazi Bayramovun müvafiq sərəncamına əsasən yaradılmış işçi qrupları tərəfindən şəhər ərazisində qanunsuz küçə ticarətinin qarşısının alınması məqsədilə mütəmadi reydlər keçirilir.
Reydlər zamanı qanunsuz ticarətlə məşğul olan şəxslərlə maarifləndirici və izahedici söhbətlər aparılır. Edilən xəbərdarlıqlara baxmayaraq, tələblərə əməl etməyən şəxslər barəsində Azərbaycan Respublikasının "İnzibati Xətalar Məcəlləsi"nin 454-cü maddəsinə uyğun olaraq inzibati protokollar tərtib edilir.
Redaksiyamıza daxil olan şikayətlərin və müraciətlərin təhlili göstərir ki, sakinlərin bir qismi aparılan monitorinqlərin gözlənilən nəticəni vermədiyini düşünür. Digərləri isə küçə ticarəti ilə məşğul olan şəxslərin bu yolla ailələrini dolandırdıqlarını və onların fəaliyyətinin məhdudlaşdırılmasının sosial baxımdan mənfi nəticələr doğura biləcəyini qeyd edir.
Cavid Şəmiyev
