Gəncə Şəhər İcra Hakimiyyətinin işçi qrupları tərəfindən qanunsuz küçə ticarətinə qarşı monitorinqlər davam etdirilir.
Gencexeber.az-a Gəncə Şəhər İcra Hakimiyyətindən verilən məlumata əsasən, qurumun başçısının müvafiq Sərəncamına əsasən yaradılmış işçi qruplar tərəfindən şəhərdə pərakəndə ticarətin geniş yayıldığı ərazilərdə mütəmadi reydlər keçirilir. Bu tədbirlər qanunsuz küçə ticarəti halları ilə mübarizə aparmaq və neqativ halların qarşısını almaq məqsədi daşıyır.
Ötən günlərdə Atatürk prospekti, Təbriz, 28 May və Bağbanlar küçələrində qanunsuz ticarətlə məşğul olan şəxslərlə maarifləndirici və izahedici söhbətlər aparılıb. Nəticədə bir sıra ərazilərdə səki və yol kənarlarında qurulmuş pərakəndə ticarət obyektləri, eləcə də ticarət köşkləri və mağaza qarşısına qoyulmuş soyuducular yığışdırılıb.
Bununla yanaşı, xəbərdarlıq və izahedici tədbirlərə məhəl qoymayan şəxslər barəsində Azərbaycan Respublikasının İnzibati Xətalar Məcəlləsinin 454-cü maddəsinə uyğun olaraq protokollar tərtib edilib.
