Gəncədə kikboksinq üzrə idmançılar üçün növbəti təlim-məşq toplanışı baş tutub.
Gencexeber.az məlumat verir ki, “Sensey” Kikboksinq Klubunun bazasında keçirilən tədbir Əməkdar məşqçi, beynəlxalq dərəcəli hakim və Azərbaycan Kikboksinq Federasiyasının (AKF) Qərb regionunun sədri Anar Məmmədovun rəhbərliyi ilə təşkil olunub.
Tanınmış kikboksçu, WAKO Avropa və dünya çempionu, peşəkar K-1 döyüşlərinin qalibi Elnur Dəryagir tərəfindən master-klas keçirilib. Tədbir iştirakçılar üçün həm texniki baxımdan məhsuldar, həm də motivasiyaedici xarakter daşıyıb.
Qeyd edək ki, Azərbaycan Kikboksinq Federasiyası tərəfindən həyata keçirilən bu cür sistemli toplanışlar idmançılar arasında birlik və həmrəyliyin gücləndirilməsinə, vətənpərvərlik ruhunun aşılanmasına, həmçinin texniki, taktiki və fiziki hazırlığın yüksəldilməsinə xidmət edir.
