Son günlər Gəncə və ətraf bölgələrdə mal-qara arasında ölümcül xəstəliyin yayılması barədə sosial şəbəkələrdə dolaşan iddialar ət satışına ciddi təsir göstərib.
Gencexeber.az-a şəhər sakinləri tərəfindən daxil olan çoxsaylı müraciətlərə görə, bazarlarda, eləcə də ət kəsimi dükanlarında mal və qoyun ətinin satışı kəskin azalıb. Bildirilib ki, internetin Gəncə seqmentində və vətəndaşlar arasında əsasən iri buynuzlu heyvanlarda (inək, camış), xırdabuynuzlu heyvanlarda (qoyun, keçi) və donuzlarda dabaq xəstəliyinin yayılması iddiaları insanlarda qorxu yaradıb.
Dabaq — cütdırnaqlı ev və vəhşi heyvanların iti yoluxucu virus xəstəliyidir. Xəstəliyin əsas əlamətləri yüksək hərarət, yem yeməmək, ağız və dırnaq nahiyəsində yaralar, selik axmasının artması və gövşəmənin dayanması ilə özünü göstərir.
İnsanlar bu xəstəliyə yalnız yoluxmuş heyvan və ya məhsullarla (xüsusilə süd və çiy ət) təmasda olduqda yoluxa bilər. Xəstəlik insandan insana keçmir, lakin insanlarda baş ağrısı, halsızlıq və ağızda ağrılı səpgilər yarada bilər.
Məlumat üçün bildirək ki, bir müddət öncə Aqrar Xidmətlər Agentliyindən bildirilib ki, bölgəmizdən heyvanların kütləvi dabaq xəstəliyinə yoluxması ilə bağlı quruma müraciət daxil olmayıb.
Lakin Azərbaycanın cənub bölgələrində, xüsusən də Astara rayonunun bır sıra kənd və qəsəbəsində fərdi, eləcə də fermer təsərrüfatlarında saxlanılan iri və xırdabuynuzlu heyvanlarda dabaq xəstəliyi yayılıb.
