Gəncədə aparılan abadlıq işləri zamanı piyadaların təhlükəsiz hərəkətinin təmin edilməsi istiqamətində kobud səhvlərə yol verilib.
Gencexeber.az-a şəhər sakini, ictimai fəal Kamil Qasımov tərəfindən verilən məlumata görə, Gəncənin Zülfü Hacıyev küçəsində Bakı Abadlıq Xidməti tərəfindən piyada səkiləri tamet daşları ilə yenidən döşənir. Lakin uşaq arabası ilə hərəkət edən analar və əlil arabasına məhkum olunmuş şəxslərin təhlükəsiz və rahat hərəkəti üçün zəruri şərait yaradılmayıb.
Təmir işləri zamanı ərazidə panduslarl nəzərə alınmayıb. Bu səbəbdən yeni döşəmə ilə köhnə səkilər arasında hündürlük fərqi yaranır ki, bu da arabalarla hərəkət edən vətəndaşlara ciddi çətinliklər yaradır. Bundan başqa, ərazinin hələ tametlənməyən hissəsində yol kənarına düzülən bordür daşlarının çoxu əyilib və aşmaq üzrədir.
Atatürk prospektində isə betonla hazırlanan panduslar da sakinlərin məyusluğuna səbəb olub. Onlar ensiz, uyğunsuz formadadır və istifadəsi əlverişli deyil.
