Gəncədə pauerliftinq üzrə dəfələrlə dünya və Avropa çempionu olmuş Rüfət Ağayevin 50 illik yubileyi münasibətilə tədbir təşkil olunub.
Gencexeber.az-ın məlumatına görə, mərasimdə ölkəmizdə pauerliftinq idmanının tanıdılmasında əməyi olan şəxslər, idman ictimaiyyətinin nümayəndələri və rəsmi qonaqlar iştirak ediblər. Çıxış edənlər vurğulayıblar ki, Rüfət Ağayev uzun illər peşəkar karyerası ərzində Azərbaycanı dünya və Avropa arenalarında, mötəbər beynəlxalq turnirlərdə uğurla təmsil edib.
Qeyd olunub ki, idmançının qazandığı nailiyyətlər və əldə etdiyi rekordlar pauerliftinq tarixində təkrarlanması çətin olan nəticələrdir. Onun ən böyük uğurlarından biri 507 kiloqram çəkini qaldırması olub.
Yubiley tədbirində Rüfət Ağayev bir daha təbrik olunub və ona xoş arzular çatdırılıb. Simvolik jest olaraq, idmançı 250 kiloqram çəkini qaldıraraq bu idman növü ilə vidalaşıb.
Bildirilib ki, hazırda Rüfət Ağayevin Gəncə şəhərində müasir tələblərə cavab verən idman zalı fəaliyyət göstərir. Onun tələbələrindən dünya və Avropa qalibləri də yetişib.
